№ 6
1524 г. декабря 18. — Жалованная данная несудимая грамота дмитровского кн. Юрия Ивановича иг. Саввина Сторожевского м-ря Серапиону на д. Розгадкино в Городском ст. Звенигородского у.
Се яз князь Юрьи Иванович пожаловал есми Рожества Пречистые Сторожевскаго манастыря игумена Серапиона з братьею или по нем иныи игумен будет, дал есми им в дом Пречистые свою деревню Розгадкино в Звенигороцком уезде в Городцком стану в андреевском приселье со всем по тому, что х тои деревне изстари потягло.
И хто у них в тои деревне учнут жити людеи и наместници мои звенигородцкие и их тиуни тех людеи не судят ни в чем, опричь душегубства и розбоя с поличным. А праведчики и довотчики поборов своих не берут и ни въежжают к ним ни по что. А ведает и судит тех своих людеи игумен з братьею сам во всем или кому прикажют. А случится суд сместнои тем людем з городцкими людьми или с становыми, и наместници мои звенигородцкие и их тиуни судят, а игумен з братьею или их приказщик с ними же судят, а присудом ся делят наполы. [13]
А кому будет чего искати на игумене з братьею или на их приказщике, ино их сужю яз Юрии Иванович или мои боярин введенои.
Писан в Дмитрове лета 7030 третьяго декабря в 18 день.
На обороте: Князь Юрьи Иванович.
Ф. 281. ГКЭ по Звенигороду. № 7/4661. Подлинник.
Печать отсутствует, имеется черный шнур от печати.
Списки кон. ХVII в.: Ф. 1199, Саввин Сторожевский монастырь. Оп. 1. Кн. 76. Л. 24-25; Кн. 150. Л. 28-28 об.