Божиею милостью и пречистыя его Матери, и по благословению отца нашего Геронтиа Митрополита всея Руси. На семъ на всемъ, брате молодши Князь Велики Михайло Борисовичь, целуй крестъ ко мне къ своему Господину и брату старейшому къ Великому Князю ИВАНУ ВАСИЛЬЕВИЧЮ всея Руси, и къ моему сыну, къ своему брату старейшему, къ Великому Князю Ивану, и къ нашему брату молодшему ко Князю къ Ондрею къ Васильевичю, и къ меншей нашей братье ко Князю къ Борису къ Васильевичу и ко Князю къ Михайлу Андреевичю, и съ своимъ братомъ молодшимъ со Княземъ Михайломъ Дмитреевичемъ, и съ меншею съ своею братьею: имети ти меня Великого Князя Ивана Васильевича всея Руси братомъ старейшимъ, и моего сына Великого Князя Ивана имети ти себе братомъ старейшимъ, а брата нашего молодшего Князя Андрея Васильевича имети ти собе братомъ, а меншую нашу братью Князя Бориса Васильевича и Князя Михайла Андреевича имети ти себе братьею молодшею. А добра вамъ хотети ............................................................................................................... и нашимъ детемъ во всемъ везде, где бы ни было, безъ хитрости; а намъ тобе добра хотети во всемъ везде, [133] где бы ни было: а что вамъ слышевъ о нашемъ добре или о лихе, что намъ на пакость отъ кого бы ни было, и вамъ то поведати намъ въ правду безъ хитрости. А хто будетъ намъ Великимъ Княземъ другъ, то и вамъ другъ; а хто будетъ намъ недругъ, то и вамъ недругъ. А где будешъ хотя послалъ на наше лихо, тамо ти отослати. А что еси былъ съ Казимиромъ съ Королемъ и съ Великимъ Княземъ Литовскимъ въ любви и въ докончанье и въ крестномъ целованье, то вамъ Казимиру Королю и Великому Князю Литовскому крестное целованье съ собя сложити передъ нашимъ Посломъ; а впередъ вамъ съ Казимиромъ съ Королемъ и съ Великимъ Княземъ Литовскимъ и съ его детми, или хто ни будетъ Король или Великий Князь на Литовской земле, и вамъ съ нимъ любви и докончанья не имати, ни Пословъ своихъ къ нему не посылати безъ нашего ведома и безъ нашие думы. А коли мы Великие Князи учнемъ имати любовь и докончанье съ Королемъ и съ Великимъ Княземъ Литовскимъ: и намъ Великимъ Княземъ тебя писати въ своемъ докончанье, что еси съ нами одинъ человекъ. А будетъ тебе Великому Князю Михайлу Борисовичю съ Королемъ и съ Великимъ Княземъ Литовскимъ любовь и докончанье взяти, и тебе съ нимъ докончанье взяти съ нами по думе; а безъ нашего ти ведома и безъ нашие думы съ нимъ любви и докончанья не имати, съ инымъ ни съ кемъ. А не съсылатися вамъ съ Королемъ и съ Великимъ Княземъ Литовскимъ и съ его детми на наше лихо никоторою хитростью; а учнетъ къ вамъ съ чемъ присылати Король и Велики Князь Литовски и его дети, и вамъ то сказати намъ Великимъ Княземъ въ правду безъ хитрости. А въ его ти имя съ своею землею не датися, ни твоимъ детемъ, ни твоей братье молодшей; а отъ насъ вамъ отъ Великихъ Князей къ Литовскому никоторыми делы не отступити, а быти вамъ на Казимира на Короля и на Великого Князя Литовского и на его дети, или хто ни будетъ Король и Велики Князь на Литовской земле, быти вамъ съ нами съ Великими Князьми на нихъ везде за одинъ. Также вамъ и съ нашими лиходеи со Княжими съ Ивановыми детми Можайского, и со Княжими съ Ивановыми детми Шемячича, и съ Ярославича сыномъ, и со Княжимъ Михайловымъ сыномъ Андреевича со Княземъ съ Васильемъ, не съсылатися съ ними никоторою хитростью, ни къ собе ихъ не приимати; а съ чемъ къ вамъ они пришлютъ, то вамъ сказати намъ въ правду безъ хитрости; а техъ вамъ послати къ намъ, кого къ вамъ пришлютъ. Такжо намъ Великимъ Княземъ и нашимъ детемъ хто згрубитъ изъ нашие братьи изъ молодшие, или хто ни будетъ нашъ лиходей: и тебе Великому Князю Михайлу Борисовичю, и твоимъ детемъ и твоей братье молодшей къ себе ихъ не приимати, а быти вамъ съ нами съ Великими Князьми на нихъ везде за одинъ. А хто згрубитъ тобе Великому Князю Михайлу Борисовичу и твоимъ детемъ изъ твоей братьи изъ молодшие: и намъ Великимъ Княземъ и нашимъ детемъ къ собе ихъ не приимати, а быти намъ съ тобою на нихъ везде за одинъ. Также вамъ и на Татаръ, и на Ляхи и на Литву, и на Немци и на всякого нашего недруга быти съ нами везде за одинъ. А будетъ намъ Великимъ Княземъ съ кемъ каково дело, а всяду на конь язъ Князь Велики Иванъ Васильевичь всея Руси, или мой сынъ Князь Велики Иванъ: и тобе Великому Князю Михайлу со мною или съ моимъ сыномъ самому всести на конь, и съ своею братьею и со всеми съ своими людми. А коли пошлемъ свою братью молодшую, и тебе съ нашею братьею свою братью послати; а где пошлемъ своихъ Воеводъ, и тебе съ нашими Воеводами своихъ Воеводъ послати; а кормъ взяти, а не корыстоватися ничемъ. А на кого будетъ пеня давная и въ ратное веремя, того не имати, ни искати на обе стороны. А которого ти брата надобе оставити себе на [134] сторожу, и тебе его оставити. А коли ти будетъ къ Орде послати, и тебе послати по думе съ нами съ Великими Князьми; а безъ нашие ти думы въ Орду не слати. А пойдетъ на тобя Король и Велики Князь Литовски, или его дети, и намъ Великимъ Княземъ самимъ пойти тебя боронити; а пошлетъ на тебя своихъ Воеводъ, и намъ послати своихъ Воеводъ тебя боронити. А въ домъ святого Спаса, въ вашу отчину въ Великое Княженье во Тферь и въ Кашинъ мне Великому Князю Ивану Васильевичю всея Руси, и моему сыну Великому Князю Ивану не вступатися, и нашимъ детемъ, ни нашей братье молодшей, ни подъискивати никоторою хитростью подъ тобою подъ Великимъ Княземъ подъ Михаиломъ Борисовичемъ, ни подъ твоими детми, ни подъ твоею братьею молодшею. А которые земли и воды потягли къ вашей отчине ко Тфери и хъ Кашину при твоемъ прапращуре при Великомъ Князе Михайле Ярославиче, и при твоемъ пращуре при Великомъ Князе Александре Михайловиче, и при Князе Костянтине и при Князе Василье Михайловичехъ, и при твоемъ прапрадеде при Великомъ Князе Михайле Александровиче, и при твоемъ прадеде при Великомъ Князе Иване Михайловиче, и при твоемъ деде при Великомъ Князе Александре Ивановиче, и при твоемъ отце при Великомъ Князе Борисе Александровиче, и при тобе при Великомъ Князе Михайле Борисовиче: того намъ Великимъ Княземъ подъ тобою подъ Великимъ Княземъ Михайломъ Борисовичемъ не искати, ни нашимъ детемъ, ни нашей братье молодшой, ни подъ твоими детми, ни подъ твоею братьею молодшею. А тебе Великому Князю Михайлу Борисовичю въ нашу отчину въ Великое Княженье въ Москву и въ Новгородъ въ Великий и во Псковъ, и во вся Новгородская и во Псковская места, во все наше Великое Княженье не вступатися, ни подъискивати никоторою хитростию подо мною подъ Великимъ Княземъ Иваномъ Васильевичемъ всея Руси, и подъ моимъ сыномъ подъ Великимъ Княземъ Иваномъ, и подъ нашими детми, и подъ нашими внучаты, и подъ нашею братьею молодшею ихъ отчинъ, ни твоимъ детемъ, ни твоей братье молодшей. А которые земли и воды потягли къ нашей отчине къ Великому Княженью къ Москве и къ Великому Новугороду при нашемъ прапращуре при Великомъ Князе Иване Даниловиче, и при нашемъ прапрадеде при Великомъ Князе Иване Ивановиче, и при нашемъ прадеде при Великомъ Князе Дмитрее Ивановиче, и при нашемъ деде при Великомъ Князе Василье Дмитреевиче, и при моемъ отце при Великомъ Князе Василье Васильевиче, и при мне Великомъ Князе Иване Васильевиче: того ти подо мною подъ Великимъ Княземъ, и подъ моимъ сыномъ подъ Великимъ Княземъ, ни подъ нашими детми, ни подъ нашими внучаты не искати, ни подъ нашею братьею молодшею, ни твоимъ детемъ, ни твоей братье молодшей. А что судилъ Кипреянъ Митрополитъ судей нашихъ вопчихъ Полукарпа и Михайла, и Ивана и Климентья, или что судили судьи наши опчие и грамоты подавали, и что будетъ взято, то взято; а что будетъ не взято, то есмя погренули и грамоты техъ судовъ подрали; а кто выложитъ техъ судовъ грамоты, ино ихъ подрати жо. А рубежъ нашей отчине Московской земле и Новгородской земле съ твоею отчиною съ Тферью и съ Кашиномъ, какъ было при нашемъ прапращуре при Великомъ Князе Иване Даниловиче, и при нашемъ прапрадеде при Великомъ Князе Иване Ивановиче, и при нашемъ прадеде при Великомъ Князе Дмитрее Ивановиче, и при нашемъ деде при Великомъ Князе Василье Дмитреевиче, и при моемъ отце при Великомъ Князе Василье Васильевиче, и при мне при Великомъ Князе Иване Васильевиче, что потягло къ нашей отчине къ Великому Княженью къ Москве и къ Великому Новугороду. А съ Новымъ ти городомъ съ Великимъ съ нашею [135] отчиною судъ по старине. А которые земли и воды отошли отъ нашие отчины отъ Великого Княженья отъ Москвы и отъ Великого Новагорода при нашемъ деде при Великомъ Князе Василье Дмитреевиче, и при моемъ отце при Великомъ Князе Василье Васильевиче, и при мне при Великомъ Князе Иване Васильевиче, а при твоемъ прадеде при Великомъ Князе Иване Михайловиче, и при твоемъ деде при Великомъ Князе Александре Ивановиче, и при твоемъ отце при Великомъ Князе Борисе Александровиче, и при тобе при Великомъ Князе Михайле Борисовиче:, а темъ землямъ и водамъ судъ и исправа на обе стороны. А новыхъ мытовъ не замышляти, а на старыхъ мытехъ имати пошлина съ воза денга, а костокъ съ человека денгажъ; а поедетъ кто на версе торговлею, ино съ того денгажъ; а кто ся промытитъ, ино съ воза промыты шесть алтынъ, а заповеди шесть жо алтынъ, колко бы возовъ ни было; а промыта то, кто обьедетъ мытъ; а мытника у завора не будетъ, а проедетъ мытъ, а състижетъ его мытникъ, и онъ возметъ свой мытъ, а промыты и заповеди нетъ. А съ лодьи пошлины съ доски по два алтына, а болши того пошлинъ нетъ, а съ струга алтынъ всехъ пошлинъ; а тамги и восмничего отъ рубля алтынъ; а тамга и восмничее взяти, аже иметъ торговати; а поедетъ мимо, и онъ знаетъ мытъ да костки, а боле того пошлинъ нетъ; а поедетъ безъ торговли, ино съ того мыта и пошлинъ нетъ. А межи насъ людемъ нашимъ и гостемъ путь чистъ безъ рубежа; а кто учинитъ рубежъ или выводъ, и рубежщика и выводчика по исправе выдати. А обидному всему межи насъ судъ опчей отъ того веремяни, какъ нашъ прадедъ Князь Велики Дмитрей Ивановичь къ Богу отшолъ; а межи насъ судити судъ опчей людемъ старишимъ, целовавъ крестъ. А суженого не посужати; а татя, розбойника, грабежника, душегубца где имутъ, тутъ судятъ; а учнется просити на изводъ, ино его на изводъ пустити. А холопу, робе, даному, положеному, заемному, поручному, земле, воде судъ отъ века. А кто иметъ холопа или должника, а поставитъ передъ Волостелемъ, въ томъ ему вины нетъ; а выведетъ изъ волости, а передъ Волостелемъ не поставитъ, въ томъ ему вина. А холопъ или роба почнется тягати съ осподаремъ, а пошлется на правду, а не будетъ по холопе или по робе поруки, ино ихъ осподарю выдати; а по должнике не будетъ поруки, ино его обвинити; а пошлинъ съ семьи три алтыны, а зъ головы алтынъ; а кой не почнется тягати, съ того пошлины нетъ. А Князей служебныхъ съ вотчинами намъ Великимъ Княземъ отъ тобя не приимати; а тобе отъ насъ отъ Великихъ Князей служебныхъ Князей съ вотчинами не приимати. А Бояромъ и слугамъ межи насъ волнымъ воля; а домы имъ свои ведати, а намъ ся въ нихъ не вступати. А судомъ и данью потянуть по земле и по воде; а на холопехъ дани не имати, на которыхъ ключники целуютъ. А которыхъ Бояръ и слугъ села, а имутъ жити въ вашей отчине, взяти на нихъ дань и судъ, какъ и на своихъ. А закладней вамъ въ нашей отчине въ Великомь Княженье въ Московской земле и въ Новгородской земле не держати; а людей вамъ нашихъ Москвитина и Новгородца блюсти, какъ и своихъ. А отойметъ Богъ которого изъ насъ, а которого изъ насъ Богъ оставитъ: ино тому, брате, печаловатися по нашемъ животе нашими Княгинями и нашими детми. А на семъ на всемъ, брате молодши Князь Велики Михайло Борисовичь, целуй крестъ ко мне къ своему Господину и брату старейшому къ Великому Князю ИВАНУ ВАСИЛЬЕВИЧЮ всея Руси, и къ моему сыну, къ своему брату старейшому, къ Великому Князю Ивану, и къ нашему брату молодшему ко Князю къ Ондрею къ Васильевичу, и къ меншой нашей братье ко Князю къ Борису къ Васильевичю и ко Князю къ Михайлу къ Ондреевичю, [136] и съ своимъ братомъ молодшимъ со Княземъ Михайломъ Дмитреевичемъ, и съ меншею своею братьею, по любви, въ правду безъ хитрости.

+ Смирены Героньтий Митрополитъ всеа Руси.

.................................................................................................................................................................................................. .................................................................................................................................................................................................. молодшей. А которые земли и воды потягли къ вашей отчине къ Великому Княженью къ Москве и къ Великому Новугороду при вашемъ прапращуре при Великомъ Князе Иване Даниловиче, и при вашемъ прапрадеде при Великомъ Князе Иване Ивановиче, и при вашемъ прадеде при Великомъ Князе Дмитрее Ивановиче, и при вашемъ деде при Великомъ Князе Василье Дмитреевиче, и при твоемъ отце при Великомъ Князе Василье Васильевиче, и при тобе при Великомъ Князе Иване Васильевиче: того ми, Господине, подъ тобою подъ Великимъ Княземъ, и подъ твоимъ сыномъ подъ Великимъ Княземъ, ни подъ вашими детми, ни подъ вашими внучаты не искати, ни подъ вашею братьею молодшею, ни моимъ детемъ, ни моей братье молодшей. А что судилъ Кипреянъ Митрополитъ судей нашихъ вопчихъ Полукарпа и Михайла, и Ивана и Климентия, или что судили судьи наши опчие и грамоты подавали; и что будетъ взято, то взято; а что будетъ не взято, то есмя погренули и грамоты техъ судовъ подрали; а хто выложитъ техъ судовъ грамоты, ино ихъ подрати же. А рубежь нашей вотчине Тфери и Кашину съ вашею отчиною съ Московскою землею и съ Новогородскою землею, какъ было при моемъ прапращуре при Великомъ Князе Михайле Ярославиче, и при моемъ пращуре при Великомъ Князе Александре Михайловиче, и при Князе Костянтине и при Князе Василье Михайловичехъ, и при моемъ прапрадеде при Великомъ Князе Михайле Александровиче, и при моемъ прадеде при Великомъ Князе Иване Михайловиче, и при моемъ деде при Великомъ Князе Александре Ивановиче, и при моемъ отце при Великомъ Князе Борисе Александровиче, и при мне при Великомъ Князе Михайле Борисовиче, что потягло ко Тфери и хъ Кашину. А съ Новымъ ми городомъ съ Великимъ съ вашею отчиною судъ по старине. А которые земли и воды отошли отъ нашие отчины Тфери и Кашина отъ Великого Княжения при твоемъ деде при Великомъ Князе Василье Дмитреевиче, и при твоемъ отце при Великомъ Князе Василье Васильевиче, и при тобе при Великомъ Князе Иване Васильевиче, а при моемъ прадеде при Великомъ Князе Иване Михайловиче, и при моемъ деде при Великомъ Князе Александре Ивановиче, и при моемъ отце при Великомъ Князе Борисе Александровиче, и при мне при Великомъ Князе Михайле Борисовиче: а темъ, Господине, землямъ и водамъ судъ и исправа на обе стороны. А новыхъ мытовъ не замышляти, а на старыхъ мытехъ имати пошлина съ воза денга, а костокъ съ человека денга жо; а поедетъ кто на версе торговлею, ино съ того денгажъ; а хто ся промытитъ, ино съ воза промыты шесть алтынъ, а заповеди шесть жо алтынъ, колко бы возовъ ни было; а промыта то, кто обьедетъ мытъ; а мытника у завора не будетъ, а проедетъ мытъ, а състижетъ его мытникъ, инъ возметъ свой мытъ, а промыты и заповеди [137] нетъ. А съ лодьи пошлина съ доски по два алтына, а болши того пошлинъ нетъ, а съ струга алтынъ всехъ пошлинъ; а тамги и восминичего отъ рубля алтынъ; а тамга и восминичее взяти, ажь иметъ торговати; а поедетъ мимо, и онъ знаетъ свой мытъ да костки, а боле того пошлинъ нетъ; а поедетъ безъ торговли, ино съ того мыта и пошлинъ нетъ. А межи насъ людемъ нашимъ и гостемъ путь чистъ безъ рубежа; а хто учинитъ рубежь или выводъ, и рубежщика и выводщика по исправе выдати. А обидному всему межи насъ судъ опчей отъ того веремяни, какъ твой прадедъ Князь Велики Дмитрей Ивановичь къ Богу отшолъ; а межи насъ судити судъ опчей людемъ старейшимъ, целовавъ крестъ. А суженого не посужати; а татя, разбойника, грабежника, душегубца где имутъ, тутъ судятъ; а учнется просити на изводъ, ино его на изводъ пустити. А холопу, робе, даному, положеному, заемному, поручному, земле, воде судъ отъ века. А хто иметъ холопа или должника, а поставитъ передъ Волостелемъ, въ томъ ему вины нетъ; а выведетъ изъ волости, а передъ Волостелемъ не поставитъ, въ томъ ему вина. А холопъ или роба почнется тягати съ осподаремъ, а пошлется на правду, а не будетъ по холопе или по робе поруки, ино ихъ господарю выдати; а но должнике не будетъ поруки, ино его обвинити; а пошлины съ семьи три алтыны, а зъ головы алтын; а кой не почнется тягати, съ того пошлинъ нетъ. А Князей служебныхъ съ вотчинами вамъ Великимъ Княземъ отъ меня не приимати; а мне отъ васъ отъ Великихъ Князей служебныхъ Князей съ вотчинами не приимати. А Бояромъ и слугамъ межи насъ волнымъ воля; а домы имъ свои ведати, а намъ ся въ нихъ не вступати. А судомъ и данью потянуть по земле и по воде; а на холопехь дани не имати, на которыхъ ключники целуютъ. А которыхъ Бояръ и слугъ села, а имутъ жити въ вашей отчине, взяти на нихъ дань и судъ какъ и на своихъ. А закладней вамъ, Господине, въ дому святого Спаса и въ моей отчине въ Великомъ Княженье во Тфери и въ Кашине не держати; а людей вамъ нашихъ Тферитина и Кашинца блюсти, какъ и своихъ. А отойметъ Богъ которого изъ насъ, а которого изъ насъ Богъ оставитъ: и вамъ, Господине, печаловатися нашими Княгинями и нашими детми. А на семъ на всемъ, Господине и брате старейши Князь Велики ИВАНЪ ВАСИЛЬЕВИЧЬ всея Руси, и съ своимъ сыномъ, съ моимъ братомъ старейшимъ, съ Великимъ Княземъ Иваномъ, целуйте ко мне крестъ къ своему брату молодшему къ Великому Князю Михайлу Борисовичю, и съ своимъ братомъ молодшимъ со Княземъ со Ондреемъ съ Василъевичемъ, и съ меншею вашею братьею со Княземъ зъ Борисомъ Васильевичемъ и со Княземъ съ Михайломъ Андреевичемъ, и къ моему брату молодшему ко Князю Михайлу Дмитреевичю, и къ меншей нашей братье, по любви, въ правду безъ хитрости.

На подлинной подписано:

+ Смирены Героньтий Митрополитъ всеа Руси.

(Перепечатано из С. Г. Г. и Д., т. I, №№ 119-120, стр. 293-299).

Комментарии

1. Вел. Князь Тверский, по сие время бывший верным союзником и другом Великого Князя ИОАННА ВАСИЛЬЕВИЧА, по покорении им Новагорода, с завистию взирал на силу Великого Князя Московского, со дня на день окружающего его области, и надеясь опасность сию от сильного сего соседа отвратить, заключил союз с Королем Польским. Кн. Великий ИОАНН ВАСИЛЬЕВИЧ, проведав о том и предвидя неминуемое бедствие из такого союза, без его ведома и против него учиненного, тогда же Великому Кн.Тверскому объявил воину. Пред самым началом воинских действий, Вел. Князь Тверский чрез Послов просил о мире, и на все ему от Вел. Князя ИОАННА ВАСИЛЬЕВИЧА предложенные условия согласясь, в 1484 году сей заключил договор.— Но сие продолжалось не долго. Приверженность его к Польскому Королю заставила Вел. Князя ИОАННА ВАСИЛЬЕВИЧА выступить к Твери съ многочисленным войском. И так в следующий год 11 Сент. Вел. Кн. Тверский, взяв с собою все сокровища, уехал тайно в Литву; а Вел. Князь ИОАНН ВАСИЛЬЕВИЧ взял под свое владение все Тверское Княжение, и отдал оное старшему своему сыну.

2. Сей Князь был сын Кн. Дмитрия Георгиевича, правнук Кн. Всеволода Александровича Холмского.

3. Начало сей Грамоты оторвано.

Спасибо команде vostlit.info за огромную работу по переводу и редактированию этих исторических документов! Это колоссальный труд волонтёров, включая ручную редактуру распознанных файлов. Источник: vostlit.info